GUARDA DE 12 A 4

petapouca

ENVERGADA nun mastro da Lúa

agárdanos a media noite

 

O sino de proa

conmovida voz astral

zarpou vogando despedidas

 

Extraviáronse os pasos do Mar

nos vieiros do vento desertor

E perdeuse pola popa

desamarrado

o ronsel

 

Fómonos transbordando

á cabotaxe das constelacións

Inventores de pseudo continentes

que imos a descubrir[1]

esculcámo-las rotas

balizadas de luceiros

 

Cun faro na man

cronometramos o pulso das tormentas

que predín os semáforos astrais

—Prepárase un naufraxio

coa ausencia cómplice do Sol!

 

Vente ventiño do mar

Vente ventiño mareiro

Vente ventiño do mar

Vente noso compañeiro

(popular)

 

E as horas a sotavento

van desviándose de nós

 

A alba intrusa

bateu as catro horas

Era o sino de proa

que tornaba do Mar

a voz desarborada

o velamio frustrado.

 
* A forma normativa do galego é garda.

 


  1. Forma perifrástica castelá, en galego sería imos descubrir.

License

De catro a catro e outros textos Copyright © by petapouca. All Rights Reserved.

Feedback/Errata

Deixe uma resposta

O seu endereço de email não será publicado. Campos obrigatórios marcados com *